我唔知大家係咪同我一樣，曾經覺得以英文為母語嘅人都幾幸福，相反廣東話好似冇咩用咁。
查實前排係連登睇到個post，個題目叫做「其實母語係英文嘅人都幾幸福」。
係呀，全世界都有識英文嘅人，就算去到邊個地方都好，用英文起碼起碼有一定程度嘅溝通能力，要做任何事都方便啲，而且全世界最高端最齊全嘅文獻就係用英文寫嘅，只要你有心去吸收知識嘅話，一定會搵到啱你用嘅材料。我相信好多人都會認同，包括我自己。甚至曾經覺得，廣東話一個咁細嘅語言，真係冇咩地位，冇咩用。
但係，喺我呢幾年追求語言知識，重新認識返自己嘅母語，亦都接觸咗唔少外語嘅過程中，到頭來先發現自己母語的偉大同珍貴。
Ben Sir喺鏗鏘集都講過哩句嘢。(14:10 - 14:32)
#1 廣東話語音複雜多變
科學啲去睇。首先分析返兩個語言嘅韻母語素成份先。 顯示緊嘅係英文嘅vowel diagram元音圖：
y軸係指口嘅開合程度，x軸係指條脷嘅前後位置。
數一數，英文嘅韻母語素有12個，
分別分佈喺11個唔同嘅位置。而另一方面，廣東話就見到有11個咁樣嘅韻母語素，
哩個數量絕對唔算少。嚟睇多少少其他語言係咩情況啦，攞我識嘅語言，普通話、日文、越南文做例子嘅話。
普通話有6個(連同音異位有10個)； 越南文有9個(連同音異位有11個)； 日文有5個。 不過越多嘅語素唔係代表越勁，越多嘅語素只係代表哩隻語言嘅發音會複雜啲，亦都代表咗可以比較容易去適應第二個語言嘅發音，當然，喺冇完全一樣嘅語素嘅情況下，好自然會用接近嘅語素去模仿第二個語言嘅發音好似e會取代咗e咁，哩個就係構成口音嘅基本原理。廣東話為母語嘅人，好似我哩啲講英文當然會有自己口音啦，不過當你要學全世界咁多種你想學嘅語言嘅時候，你會慢慢發現以廣東話為母語嘅人，都普遍適合學外語。但係如果你問點解好多香港人學咗廿年英文都學到成pat屎咁，哩個涉及課程、師資、制度嘅問題，之後有機會可以另擇篇幅再講。
#2 九聲六調嘅聲調系統，帶來強烈嘅抑揚頓挫
作為廣東話最大嘅特點，九聲六調。廣東話嘅聲調系統令到廣東話講嘢嗰陣有明顯嘅高低起伏，帶來強勁嘅音樂性，哩樣嘢確實係獨一無二。全世界咁多種語言，真係冇乜邊個語言嘅聲調可以構成咁完整嘅音階，所以我哋說話嘅高低起伏本身韻律性已經好強。亦都係哩個原因 廣東歌對於填詞嘅要求都好高，會重視本身歌詞嘅聲調夾唔夾個旋律，哩個就叫做歌曲嘅協音性，即係所謂嘅啱音，啫係將首歌嘅歌詞直接搬出嚟就等於嗰個字本身嘅發音，唔會變咗啲第啲字咁。歌曲嘅協音性本身係聲調語言都需要有嘅元素，但係當語言自身聲調數量不足以維持嘅哩樣嘢，大部份語言都會無視佢。不過我唔係話啱音嘅語言先勁呀，唔好屈我。只係以廣東話為母語嘅人音感會比較強，講嘢都會有明顯嘅音階，宏觀全世界我哋會發現，廣東話係個非常獨特嘅語言。
#3 廣東話語感豐富
廣東話作為我哋嘅母語，你會發現好多時候，只有母語先表達到我哋想要嘅語感，而哩個未必係同語言嘅熟練度有關，廣東話好多時候同一句說話，可以有幾廿種嘅語氣去表達，一個最簡單嘅「係」字，可以有： 「係啦、係喎、係噃、 係囉、係喇、係嘅、係嘅、係啩、係啫、係嘞、係咩、係㗎、係嘛、係囉噃、係嘅啫、係呀嘛、係吖嘛、係㗎咩、係囉喎、係㗎可、係㗎啦喎、係㗎喇吓嘩」 呢度廿幾種唔同嘅語氣，各有特色，細膩嘅語感舉足輕重，所以以廣東話為母語嘅人好識得表達自己，語言能力都相當高，我唔係話語氣詞越多，哩個語言就越優越，只係語言作為溝通嘅工具，有方法可以表達細膩情感，絕對係一件好事。 講咗以上咁多，唔係要話乜嘢廣東話最勁呀，第二啲語言都係垃圾呀咁嘅意思，我只係覺得哩個語言作為我嘅母語，日日都講日日都用，一直唔覺得有啲咩特別，但係當我接觸咗咁多外語，學咗咁多語言知識，教埋外國人廣東話，先至發現原來自己嘅母語有哩啲咁獨特嘅元素。好多時候我哋會羨慕見到嘅嘢，但係忽視咗自身有嘅嘢，令到見唔到自己嘅優勢，又見唔到自己嘅不足，得閒羨慕人哋，諗下點學多幾種語言，再唔係，加入我團隊學返幾招認識廣東話嘅文化底韻仲好啦。
一個專為廣東話母語者而設的廣東話普及課程
