廣東話普及學院Logo

COLLEGE OF CANTONESE POPULARIZATION

廣東話普及學院

​我們是一群廣東話推廣者,現在透過網絡,向全世界展示廣東話的博大精深。

追隨者來自包括日韓、越南、泰國、英美、俄羅斯、巴西等意想不到的地方。

  • YouTube
  • Facebook
  • unnamed
  • Instagram
  • Twitter
搜尋

未嚟香港已經學廣東話嘅5種人

隨住我哋嘅網絡課程開始,認識咗好多就算唔係住喺香港,都因為唔同原因,想要學好廣東話嘅人。今日我就要同大家歸納一下,未嚟香港已經學緊廣東話嘅5種人,特別同佢哋致敬!


1)中意香港文化,可以係電影流行曲明星等等,嘅人


強盛嘅香港文化,造就咗好多外地人學習廣東話嘅契機。

無論係八九十年代紅極一時嘅港產片,後來締造經典嘅四大天王李克勤陳奕迅,至到哩兩年人氣爆發性急升嘅Mirror。

我哋近排收到好多來信,有一班唔係住喺香港嘅人,因為留意到哩班冒起嘅香港明星,想知道佢哋嘅明星喺啲節目度或者接受訪問嗰陣講啲乜嘢,就係咁開始學廣東話。

哩種因為香港文化而學廣東話嘅人,相信佔大多數,佢哋目標明確,而且有足夠動力持續學習。


2)希望嚟香港長期工作、生活嘅人


要喺香港長期工作同生活,廣東話係一個必要嘅溝通工具。

無論係因為中意香港嘅生活模式,定係純粹睇中香港搵錢簡單,希望第時嚟到香港可以迅速融入生活而預先學習廣東話,喺我嘅學員入面都不在少數。

雖然要做到哩個目標,需要掌握嘅廣東話唔係好多,但係嚟香港做嘢,融入香港,絕對係香港嘅一份子!


3)同香港人拍拖,希望更加了解佢嘅人


識咗香港男朋友、女朋友,希望用對方嘅母語嚟更加了解對方,甚至決定結婚,準備搬嚟香港住。

因為愛情嘅原因要學廣東話,真係令人感動。

哩類人唔算多,但係因為要學廣東話嘅原因,普遍都非常之強烈,所以可以達到嘅境界,往往都係非常之高,有唔少仲係以母語級嘅目標嚟學,有時你根本唔為意佢係來自外地。


4)覺得廣東話好聽,純粹中意廣東話嘅人


有啲人話廣東話好好聽,有種吸引人嘅魔力,我有位朋友就試過喺外國,用廣東話同朋友傾緊偈嗰陣畀路人搭訕話,你哋講廣東話真係好性感呀。

雖然唔知係咪事實呀下,不過我嘅觀眾入面,確實係有唔少人係中意廣東話音韻嘅抑揚頓挫而開始學廣東話嘅。

作為母語者未必會有咁嘅感受,我都係一路學外語,一路教授廣東話嘅期間,先識得重新欣賞返自己母語嘅美。


5)知道廣東話獨特,希望深入研究哩個語言嘅人


因為地理環境同歷史因素,廣東話係一個研究價值相當高嘅語言。

係除咗普通話之外,唯一喺海外大學有獨立研究嘅漢語族語言。

如果大家中意語言嘅話,或者都會留意到,有唔少polyglot(多語能力者)都有學過廣東話嘅。

好似識幾十個語言嘅Moses Monweal McCormick、識廿個語言嘅Steve Kaufmann、識十個語言嘅秋山燿平、語言學家同時係我老友嘅Adam。

當然啦仲有唔少睇緊我Channel嘅觀眾!


以上就係未嚟香港已經學緊廣東話嘅5種人,有啲人會話廣東話係方言,冇咩咁巴閉,學嚟都冇用。
確實一個語言冇分巴唔巴閉,但係全世界就總係有一班,無論點樣都想學好廣東話嘅人。唔知你身邊又有冇呢度邊一種人呢?




一個專為廣東話母語者而設的廣東話普及課程

https://www.cantonesecollege.com/we-are-cantonese







49 次查看0 則留言

最新文章

查看全部

多謝晒喎!